60 [SEN. De ira III xxvi 3]

Deinde ad condicionem rerum humanarum respiciendum est, ut omnium accidentium aequi iudices simus: iniquus autem est, qui commune vitium singulis obiecit. [...] Omnes inconsulti et improvidi sumus, omnes incerti, queruli, ambitiosi, --quid lenioribus verbis ulcus publicum abscondo?-- omnes mali sumus. Quidquid itaque in alio reprenditur, id unusquisque in sinu suo inveniet. [...] Placidiores itaque invicem simus: mali inter malos vivimus. Una nos res facere quietos potest, mutuae facilitatis conventio, "Ille iam mihi nocuit, ego illi nondum". Sed iam aliquem fortasse laesisti, sed laedes. Noli aestimare hanc horam aut hunc diem, totum inspice mentis tuae habitum: etiam si nihil mali fecisti, potes facere. [ES] [EN]